Konseho Insular di Boneiru ta bishitá promé minister di Sint Maarten
Riba 10 di febrüari 2025, Konseho Insular di Boneiru a hiba un bishita na e promé minister di Sint Maarten, sr. Luc Mercelina. Durante e enkuentro aki, a duna énfasis riba e deseo pa mantené i fortalesé e laso entre e islanan.
Na e enkuentro tabata presente e konsehalnan Benito Dirksz, Cyrill Vrolijk, Desiree Coffie, Simeona Chirino-Felida, Rolanda Hellburg-Makaai i Daniel Crestian. A trata diferente temanan importante, inkluyendo e struktura polítiko aktual di e dos islanan, deseo i ambishonnan pa futuro, i un retrospektiva di e formashon i situashon aktual di e struktura polítiko di e eks-islanan di Antias Hulandes.
Un momentu partikular durante e enkuentro tabata e laso personal ku e promé minister di Sint Maarten tin ku Boneiru. Su tata tabata Boneriano, miéntras su mama ta di Sint Maarten. E kombinashon di e dos kultura nan aki ta enfatisá e laso históriko i kultural fuerte entre e islanan.
E delegashon a kombersá tokante e deseo grandi i ambishonnan pa Boneiru i a suprayá e importansia di kolaborashon i sosten mutuo den e parti Karibense di Reino Hulandes. E enkuentro a resultá hopi balioso, i e dos partido a ekspresá nan intenshon pa intensifiká e kolaborashon i kolaborá pa solushoná desafionan huntu.