Tur kuater desishon akseptá pa Konseho Insular

Den e reunion di Toma di Desishon (BVR) di 27 di febrüari último, Konseho Insular a aprobá unánimemente e teksto di perfil pa e posishon di gezaghèber di Boneiru, e stipulashon di e kambio di e komishon di konfiansa i e provishon di 2.5 mion dòler manera tabata planeá pa e inisio di nobo di BonLab. Ademas, den kuadro di e revishon di e Lei di Entidat Públiko Boneiru, St. Eustatius i Saba (WOLBES) i e Lei di Finansa di Entidat Públiko BES (FINBES) a stipulá ofisialmente e dokumento ‘Het Standpunt van Bonaire’, manera e título di e dokumento ta, ku ocho voto pro i un voto kontra.

Manera e Representante interino di Reino Jan Helmond a ripití durante e reunion di e Konseho Insular di e isla, despues di a gradisí e miembronan di e Konseho pa nan kooperashon, e aktual formulashon di e perfil di gezaghèber ta, segun su opinion, kompleto i total. Ku e kapasidatnan manera krea union, independiente, rekonosibel, íntegro i resistente na strès komo kompetensianan prinsipal, ta spera di e gezaghèber nobo ku ta bai nombra, entre otro, ku den su ròlnan komo mama/tata di siudadanonan, presidente di Konseho Insular, presidente di Kolegio Ehekutivo (BC) i komo enkargado di e karteranan di órden públiko i seguridat, e lo guia e kresementu (ya realisá) di Boneiru di forma korekto, lo fortalesé e poder ehekutivo di e isla i mantené e ambishonnan den balansa ku bista riba e poder ehekutivo eksistente.

Mirando ku ainda no por a nombra un gezaghèber nobo i ku e Konseho Insular i frakshonnan a kambia di komposishon, e komposishon di e komishon di konfiansa tambe mester a kambia. E komishon di konfiansa den kuadro di nombramentu di un gezaghèber nobo awor ta konsistí konsekuentemente di sinku miembro di Konseho Insular i un miembro di BC ku un ròl di konsehero. Nan ta: sra. D. Coffie pa frakshon di M21, sr. B. Dirksz pa UPB, sr. D. Tromp pa PDB, sr. C. Vrolijk pa frakshon Vrolijk, sr. H. Wout pa MPB i diputado C. Abraham komo konsehero.

Pa loke ta trata BonLab, tur miembro di Konseho Insular tabata di akuerdo ku BonLab mester keda. A konsiderá e posishon di Ministerio di Salubridat, Bienestar i Deporte (VWS) ku Boneiru mester tin un solo laboratorio i ku e laboratorio akí mester ta parti di Mariadal komo inakseptabel. Pa salvaguardiá i sigurá e sobrebibiensia di BonLab, Konseho Insular a disidí unánimamente pa pone e 2.5 mion ku a akordá na novèmber 2023 disponibel pa e reapertura di BonLab. Esaki ta nifiká ku BonLab lo amplia su servisionan. Por ehèmpel, BonLab lo desaroyá aktividat riba tereno di alimentashon i medio ambiente den kuadro di e Lei di Salubridat Públiko. Ademas Konseho Insular a desidí pa bolbe bai deliberá ku VWS tokante nan punto di salida.

Despues di siman, si no ta luna, di diskushon ku e propio komishonnan, Kolegio Ehekutivo i Kolegio Insularnan i e Kolegio Ehekutivonan di Saba i St. Eustatius; e Konseho Insular di Boneiru huntu ku e grefir interino por bai Hulanda ku e dokumento ‘Het Standpunt van Bonaire’ (E Punto di Salida di Boneiru) ku ta permití e miembronan di e Konseho Insular boga pa mihó leinan i regulashon pa Boneiru. E diskushon akí ku e gobièrnu Hulandes Oropeo tokante e interesnan, derechonan i obligashonnan di Entidat Públiko Boneiru ta tuma lugá durante e bishita di trabou di tres dia di Konseho Insular na Hulanda na komienso di mart.

Pa logra e adaptashon di 17 punto den WOLBES i FINBES, Konseho Insular ta entregá 13 proposishon argumentá, enfokando riba mehorashon di bienestar di e siudadanonan di Boneiru i fortalesé kontrol demokrátiko i kalidat di gobernashon. A base di e fortifikashon di e outonomia di e órganonan públiko, e Konseho Insularnan tin komo enfoke kuater prinsipio i/òf punto di salida; 1) e órden legal aktual ta keda na vigor, 2) outonomia i outodeterminashon, 3) struktura nobo di gobernashon i 4) diferensiashon.

Mantenshon di e órden legal aktual ta nifiká ku no mester kambia tratadonan, manera Statuto i Konstitushon, pasobra Boneiru ta boga pa mehorashon den implementashon di e struktura polítiko ku ta kuadra ku e kuadronan ei.
Outonomia i outodeterminashon ta nifiká, entre otro, ku Hulanda Oropeo ta rekonosé e status spesial komo entidat públiko ku tur loke esaki ta enserá i no ta trata òf konsiderá e islanan BES mas tin ora si i otro ora nò komo munisipio spesial di Hulanda.
Ku e struktura nobo di gobernashon ta referí prinsipalmente na un eskoho liber den kaso di interpretashon di e status. Komo resultado, na lugá di implementá lei i regulashon nobo di Hulanda Oropeo kasi outomátikamente, lo mester tèst promé si e tres islanan ke e regulashon nobo i kiko ta mihó pa kada isla individualmente.
Esaki ta enserá e último punto di salida, e prinsipio di diferensiashon. Komo ku kada isla tin su propio karakter i pues e habitantenan por tin diferente deseo pa kada isla, mester por krea espasio pa esaki den WOLBES i FINBES.

A base di e kuater prinsipionan básiko ariba menshoná, Konseho Insular ta entregá konsekuentemente diestres proposishon elaborá bou di sinku tópiko. E tópiko general ta inkluí e dos proposishonnan pa kambia e nòmber di e entidat públiko Bonaire pa Boneiru/ Bonaire i tambe pa rekonosé i usa papiamentu komo idioma atministrativo. 
E proposishonnan pa ekspandé i fortalesé Konseho Insular, ekspandé Kolegio Ehekutivo, nombramentu di gezaghèber i presidensia tékniko di Konseho Insular ta hinká bou di e di dos tópiko, e organisashon atministrativo. 
Pa logra un mihó relashon ku reino, e di tres tópiko, kaminda Boneiru, spesialmente den e áreanan di kuido di salubridat, edukashon, seguridat sosial i relashonnan eksterior, tin e impreshon ku ta skucha e opheshonnan hustifiká di e isla insufisientemente; Konseho Insular ta proponé pa nombra un representante permanente di e isla na Den Haag, pa añadí un Konseho di Estado Boneiru na e Konseho di Estado i kaminda ta posibel, pa introdusí ko-determinashon.
Un formula nobo di kalkulashon di e kantidat di kontribushon di reino i e benefisio liber i mas responsabilidat i espasio pa maneho finansiero den e área di finansa, e di kuater tópiko, mester pone un fin na e hecho ku e benefisio liber na Saba i St. Eustatius per capita ta mas haltu ku na Boneiru i ademas en realidat ta kapasitá Boneiru pa atendé ku redukshon di pobresa, e konsekuensianan di kambio di klima, e falta di kas di hür i di kompra pagabel i e problemanan esensial di infrastruktura.
Finalmente komo e último tópiko, pa por organisá mihó e supervishon atministrativo i finansiero, i pa garantisá su independensia i imparsialidat, Konseho Insular ta proponé pa uni e supervishon atministrativo i finansiero na un forma independiente den un órgano atministrativo independiente ku lo a establesé resientemente, den kua a unifiká e tareanan di e Representante di Reino, e Minister di Finansa, e Kolegio di Supervishon Finansiero i e Kontrolaria General den e área akí.